रोल्पा ।
आफ्नो जनकारवाहीमा परेका एक वडा सदस्यको घर नेपाल कम्युनिस्ट पार्टीले कब्जा गरेको छ । उनले भ्रष्टाचार गरेको पुष्टि भएको जानकारी दिँदै नेकपाले कारवाहीमा परेको हप्तादिन नपुग्दै माडी गाउँपालिका वडा नम्बर १ का सदस्य हरि प्रसाद घर्तीको घर कब्जा गरेको हो ।
घर्तिलाई नेकपा माडी गाउँपालिकाको स्थानीय जनसरकारकाे कारवाहीमा परेका घर्तीलाई जनताका बीचमा राखेर छलफल गर्न बोलाइएको भए पनि उनी उपस्थित हुनुको साटो भागेको भन्दै उनले भ्रष्टाचार गरेको ठहर भएको सो पार्टीले जनायो । सोझासाझा जनतालाई अनेक प्रलोभन देखाएर चुनावमा भोट माग्ने र जनप्रतिनिधि भएर गइसकेपछि काम गर्ने बेलामा भ्रष्टाचार गरेर कालोधन आर्जन गर्न खोजेको भन्दै उनको घर नै कब्जामा लिइएको सो पार्टीले जनाएको छ ।
वडा सदस्य घर्तीले कृषि क्षेत्रमा आएको कुल रकम १८ लाख ७० हजार ५को हिसाब नदेखाएको भन्दै कार्वाही स्वरुप र उक्त रकम असुल गर्न घर कब्जा गरेको नेकपाले जनाएको छ । घर्तीले भ्रष्टचार गरेको तथ्य प्रमाण आफ्नो पार्टीसँग सुरक्षित रहेको समेत विप्लव नेतृत्वको नेकपा माडी गाउँपालिका प्रमुख सुर्य खड्काले जानकारी दिए ।
घर कब्जाको क्रममा नेकपा माडी गाउँपालिका प्रमुख सुर्य खड्का, अभियान कमान्डर कुशल वली, दिनेश वली स्थानीय जनतासहित दर्जनौं नेता कार्यकर्ताको सहभागिता रहेको थियो । सोहि क्रममा माडी गाउँपालिका तथा रोल्पा नगरपालिका अभियान कमान्डर वलीले घर कब्जा गरी भ्रष्टाचारको रकम असुल गर्ने र भ्रष्टाचारीलाइ नछोड्ने बताए ।
उक्त बिषयमा थप अनुसन्धान गर्न नेकपा माडी गाउँपालिकाले बिजय घर्ति मगरको संयोजकत्वमा ५ सदस्यीय छानबिन समिति बुधबार नै गठन गरिसकेको समेत अमरसिङ घर्ति ‘मित्रमनी’ले जानकारी दिए ।
२०७५ भदौ १४ मा प्रकाशित ।
