भक्तपुर । भक्तपुरको नयाँठिमी चोकमा टिपरको ठक्करबाट डिउटीमा रहेका प्रहरीको मृत्यु भएको छ ।
सोमबार राती साढे ९ बजे काठमाडौंबाट भक्तपुर तर्फ आउँदै गरेका दुई टिफरहरु एकआपसमा ठक्कर खाँदा महानगरीय प्रहरी वृत्त ठिमीमा कार्यरत प्रनानि निम बहादुर घर्तीको मृत्यु भएको हो ।
मध्यपुर ठिमी नपा ४ नयाँ ठिमी चोकमा काठमाडौंबाट भक्तपुर आउँदै गरेको बा ४ ख ४७०१ नं को टिफर पछि पछि संगै आउदै गरेको बा ४ ख ४३१८ नं. को टिफरहरु एकैसाथ नयाँठिमी बालकुमारी चोकको बिचको रेलिङलाई हान्दै अनियन्त्रित भई अगाडी बढ्दै जाँदा ईप्रका रुकुमकोट पुर्वी रुकुम दरबन्दी भई हाल महानगरीय प्रहरी वृत्त ठिमी भक्तपुरमा कार्यरत रहेका घर्तीको मृत्यु भएको हो ।
सोही क्षेत्रमा गस्तीमा रहेका प्रनाउ ऋषिराम कडेलको टोली तत्कालै पुगी घाईते र्घीलाई उपचारार्थ मध्यपुर ठिमी अस्पताल भक्तपुरमा प्राथमिक उपचार गराई टाउकोमा गम्भिर चोट लागेकोले थप उपचारका लागी नर्भिक अस्पताल थापाथली लगी उपचार हुँदाहुदै घर्तीको आज मंगलबार बिहान ०५ः१५ बजे उपचारको क्रममा मृत्यु भएको महानगरीय प्रहरी परिशर भक्तपुरका सूचना अधिकारी प्रनाउ दिपक गिरीले जानकारी दिए ।
दुर्घटना गराउने दुबै सवारी साधन र दुबै चालकलाई नियन्त्रणमा लिई स्वास्थ्य परिक्षण गराउदा बा ४ ख ४३१८ नं को टिफर चालक राकेश सैँजुले मादक पदार्थ सेवन गरेको पाईएको प्रनाउ गिरीले जानकारी दिए ।
पानी परी सडक भिजेको अवस्थामा लापरवाही तरिकाले तीब्र गतिमा सवारी साधन चलाएकोले गर्दा दुर्घटना भएको प्रारम्भिक अनुसन्धानमा खुल्न बुझिन आएको, घटना सम्बन्धमा थप अनुसन्धान कार्य जारी रहेको प्रहरीले जनाएको छ ।
प्रहरीका अनुसार बा ४ ख ४७०१ नं को टिफर चालक जिल्ला धादिङ थाक्रे गापा–८ बस्ने वर्ष ४० का राजेन्द्र प्याकुरेल र बा ४ ख ४३१८ नं.को टिफर चालक जिल्ला भक्तपुर भक्तपुर नपा–३ बस्ने वर्ष ४४ को राकेश सैँजु रहेका छन् ।
