बनेपा, ३० भदौ । शेयर बजारमा आर्कषण बढ्दै जाँदा नयाँ÷नयाँ लगानीकर्ता भित्रिएको बनेपाका ब्रोकर कार्यालयमा शेयर कारोबारको रकम कम देखिएको छ ।
बनेपामा भिजन सुक्युरिटिज प्रालि (३४), र ४० नम्बर ब्रोकर कार्यालय क्रियाटिभ सेक्युरिटिज प्रालिले बनेपा शाखा कार्यालयमार्फत डिम्याट गर्ने र शेयर कारोबारको काम गर्दै आएका छन् ।
भिजन सेक्युरिटिज प्रालि बनेपा शाखाका प्रमुख प्रकास अधिकारीले शेयर बजारमा आएको गिरावटले आर्थिक कारोबार कम भएको उल्लेख गर्दै नयाँ÷नयाँ लगानीकर्ता केही हतास भएको बताए । उनकाअनुसार बिहीबारको कारोबार अन्य दिनको तुलनामा सन्तोषजनक भएको थियो । सो शाखामार्फत यो साता पाँच करोड २६ लाख ५२ हजार ७०० को शेयर कारोबार भएको छ ।
गत साता उक्त ब्रोकर कार्यालयबाट तीन दिनको अवधिमा पाँच करोड ७२ लाख ६० हजार ९५ को शेयर कारोबार भएको थियो । क्रियाटिभ सेक्युरिटिज प्राली बनेपाले यो साता तीन करोड ३९ लाख ४२ हजार २१७ को कारोबार गरेको छ । गत साता सो ब्रोकर कार्यालयले तीन दिनको अवधिमा दुई करोड १८ लाख ९१ हजार ५९ को शेयर कारोबार गरेको थियो ।
क्रियाटिभ सेक्युरिटिज प्राली बनेपा शाखाका प्रमुख राजेन्द्र मर्हजन शेयर कारोबारमा गिरावट आएका कारण नयाँ लगानीकर्तामा उत्साह नभएको बताउँछन । उनकाअनुसार बनेपा बाहेक, धुलिखेल, पनौती, भक्तपुरबाट पनि शेयर कारोबार गर्न लगानीकर्ता आएका छन् । बनेपामा यी दुई ब्रोकर कार्यालयसहित तीनवटा ब्रोकर कार्यालयले शेयर खरिद, बिक्रीको काम गर्दैआएका छन् ।
