काठमाडौं । चर्चित अमेरिकन पपस्टार सेलेना गोमेजका लागि उनकी एक साथीले आफ्नो मृगौला नै उपहार दिएकी छन् । गोमेज लुपुस नामक रोगका कारण समस्यामा परेको थाहा पाएपछि उनकी मिल्ने साथी तथा फ्यान फ्रान्सिया रेइजाले मृगौला दान गरेकी हुन् ।
रेइजाले मृगौला दिएपछि गोमेजको मृगौला प्रत्यारोपण गरिएको छ । आफूले मृगौला प्रत्यारोपण गरेको कुरा गोमेजले इन्स्टाग्रामबाट सार्वजनिक गरेकी हुन् । इन्स्टाग्राममा उनले अस्पतालको वेडमै खिचिएका फोटोहरु पोस्ट गर्दै यसबारे जानकारी गराएकी छन् । जसमा उनले पछिल्लो समय काम गर्न नसक्नुका कारणबारे पनि आफ्ना फ्यानहरुलाई जानकारी गराएकी छन् ।
इस्टाग्राममा सार्वजनिक गरिएको फोटोमा गोमेज र रेइजा दुबै अस्पतालको बेडमा एकअर्काको हात समातेर पल्टिएका छन् । उनले भनेकी छन्, ‘मैले लुपुस नामक रोगका कारण मृगौला प्रत्यारोपण गर्नुपरेको थियो । रेइजाले मलाई मृगौला दान गरेर परम उपहार दिइन् ।’
गोमेजलाई मृगौला दान गर्ने रेइजा पनि एक अभिनेत्री हुन् । रेइजाले द सेक्रेट लाइफ अफ अमेरिकन टिनेजरलगायतका सिरिजमा अभिनय गरिसकेको बताइएको छ ।