धनुषा, २१ साउन । हंसपुर नगरपालिकामा प्रमुख र उपप्रमुख पक्षधरबीच आज भएको विवाद झडपमा परिणत हुँदा स्थिति तनावपूर्ण बनेको छ । झडप नियन्त्रण गर्न प्रहरीको लाठी चार्जबाट उपप्रमुखसहित आधा दर्जन घाइते भएका छन् ।
कार्यालयसम्बन्धी भएको विवादमा प्रहरीको लाठी चार्जबाट आधा दर्जनभन्दा बढी स्थानीय घाइते भएका छन् । आज दिउँसो प्रहरीको सहयोगमा प्रमुख रामज्ञान मण्डल पक्षका व्यक्तिले उपप्रमुख रेणु झाले सञ्चालन गर्दै आएको कार्यालयबाट बलजफ्ती सामग्री लिन खोज्दा दुवै पक्षबीच झडप भएको थियो ।
झडपका क्रममा उपप्रमुख झासहित वडा नं २ बघचौडाका अध्यक्ष उदय साह, तपेश्वर मण्डल, फेकन कापर, पुण्य खत्रीलगायत घाइते भएका छन् । घाइतेमध्ये मण्डलको अवस्था गम्भीर रहेको छ । उनको थप उपचारका लागि जनकपुर अञ्चल अस्पताल ल्याइएको छ ।
स्थानीयका अनुसार उपप्रमुखको कार्यालयबाट सामग्री लग्न प्रहरीसँगै प्रमुख मण्डल करीब ६० जनाको समूहका साथ आउनुभएको थियो । घरेलु हातहतियारसहित उनीहरु दुई वटा ट्याक्टरमा आएका थिए । उपप्रमुख पक्षधरबाट स्थानीयले प्रतिकार गर्न खोज्दा दुवै पक्षबीच झडप भएको हो । स्थिति तनावपूर्ण बनेकाले तारापट्टी, बेलही, धनुषाधामलगायतका प्रहरी चौकीबाट दर्जनौँको सङ्ख्यामा नेपाल प्रहरी र सशस्त्र प्रहरी परिचालन गरिएको छ ।
