चितवन, २१ साउन । तेस्रो पर्यटकीय गन्तव्य चितवनमा भ्रमण वर्ष २०२० को तयारी शुरु गरिएको छ । सरकारी र निजी क्षेत्रले सहकार्य गरेर राष्ट्रिय र अन्तर्राष्ट्रियरूपमा यहाँको पर्यटकीय गन्तव्यको प्रचारका लागि गृहकार्य थालिएको हो ।
जिल्ला समन्वय समिति चितवनका प्रमुख कृष्णकुमार डल्लाकोटीका अनुसार जिल्लास्थित सरोकारवालाहरूको सहभागितामा जिल्लास्तरीय सहजीकरण तथा आयोजक समिति गठन गर्न लागिएको छ । यसैगरी जिल्लाका सात वटै पालिकामा प्रमुखको संयोजकत्वमा आयोजक समिति गठन गर्न आग्रह गरिएको जानकारी उनले दिए ।
ती समितिहरूमा सरोकारवाला सबै पर्नेछन् । समितिका सदस्यबाट विभिन्न उपसमिति निर्माण गरी भ्रमण वर्ष सन् २०२० लाई प्रभावकारी बनाउने काम गरिने डल्लाकोटीले जानकारी दिए । उनले भने, “चितवनका पर्यटकीय गन्तव्यहरूलाई राष्ट्रिय र अन्तर्राष्ट्रियरूपमा चिनाउने गरी हामी काम गर्दैछौँ ।”
भरतपुर महानगरपालिका प्रमुख रेनु दाहालले महानगरस्तरीय सहजीकरण तथा आयोजक समिति गठन गरी भ्रमण वर्षलाई प्रभावकारी बनाउन विभिन्न गतिविधिहरू अघि बढाउन लागिएको बताए। महानगरपालिका राप्ती र नारायणी नदीको बीचमा रहेको छ । महानगरको अधिकांश भाग चितवन राष्ट्रिय निकुञ्जको मध्यवर्ती क्षेत्रमा पर्दछ । प्रमुख दाहालले भने, “भ्रमण वर्षको प्रचारप्रसारमा कुनै कमी हुन दिने छैनौँ ।”
पर्यटन विकास समिति चितवनका महासचिव विश्व सुवेदीले जनवरी १ तारिखमा स्मारकसहित भ्रमण वर्षका कार्यक्रम शुरु गरिने बताए । निजी र सरकारी क्षेत्रको समन्वयमा कार्यक्रमहरू हुने उनले जानकारी दिए। नयाँ गन्तव्यहरूको समेत पहिचान गरी प्रचारप्रसार गरिने छ ।
क्षेत्रीय होटल सङ्घ सौराहाका अध्यक्ष सुमन घिमिरेले नियमित कार्यक्रमका अतिरिक्त अन्तर्राष्ट्रिय हात्तीपोलो, दशैँ महोत्सव, नेपाली नयाँ वर्ष विशेष कार्यक्रमजस्ता पर्यटक प्रवद्र्धन गर्ने गतिविधि गर्ने तयारी गरिएको बताए । हाल जिल्लामा दुई लाख हाराहारी पर्यटक आउने गरेकामा यो सङ्ख्यालाई दोब्बर बनाउने गरी प्रचारप्रसारमा जुट्ने घिमिरेको भनाइ छ ।
के–कस्ता कार्यक्रम प्रभावकारी हुन्छन् भन्ने विषयमा रत्ननगर नगरपालिकाका प्रमुख नारायण वनसहितको विज्ञ समूहहरूसँग छलफलसमेत भइरहेको उनले जानकारी दिए । भ्रमण वर्षमा चितवनमा के भयो भन्ने प्रश्नको जवाफ दिन सक्ने गरी कार्यक्रम गरिने घिमिरेको भनाइ छ ।
सौराहाका होटलहरूले स्तरोन्नतिका लागि कामसमेत गरिरहेका छन् । होटलमा रङरोगन गर्ने, क्षमता विस्तार गर्ने, पौडीपोखरी निर्माण गर्नेजस्ता काम भइरहेका छन् । चितवनमा मुख्यरूपमा राष्ट्रिय निकुञ्जभित्र रहेका दुर्लभ वन्यजन्तु बाघ, एकसिङ्गे गैँडा हेर्न धेरै पर्यटक आउने गर्दछन् । यसका अतिरिक्त पवित्र तीर्थस्थल देवघाटधाम, माडीको गोद्धक, सोमेश्वरगढी, पाँचपाण्डव, वाल्मिकी आश्रम, जिरौनाको धर्मधामलगायतका स्थलमा पर्यटक आउने गर्दछन् ।
चितवन उच्च पहाडी क्षेत्रदेखि समथर मैदानसम्म रहेकाले सिराइचुली, उपारदाङ्गढीलगायतका पहाडी क्षेत्रमा पनि पर्यटक पुग्ने गर्दछन् । यसै जिल्लाबाट केबलकार चढेर मनकामना जानेहरूको सङ्ख्या पनि ठूलो हुने गर्दछ ।
