काठमाडौं । चालक दलका सदस्यको चलाखीले एक यात्रुको विमान अपहरण गर्ने प्रयास असफल भएको छ । विमान बंगलादेश एयरलाइन्सको विमान अपहरण गर्न खोज्ने एक युवक नै सुरक्षाकर्मीको कारबाहीमा मारिएका छन् ।
१४८ जना यात्रुसहित उडेको विमानमा एक जना युवक ककपिटमा पुगेर पेस्तोल देखाउँदै नियन्त्रणमा लिन खोजेका थिए ।
बंगलादेशको राजधानी ढाकाबाट दुबईतर्फ उडिरहेको बीजी १४७ फ्लाइट नम्बरको विमानलाई अपहरण गर्न खोज्न युवक सुरक्षा कार्वाहीमा मारिएका हुन् ।
ती व्यक्तिले बंगलादेशकी प्रधानमन्त्री शेख हसिना बाजेदसँग कुरा गर्न पाउनु पर्ने माग गरेका थिए । विमानका चालकले चलाखीपूर्ण रुपले प्रधानमन्त्रीसँग कुरा गराइदिने आश्वासन दिएर चटगाउँस्थित शाह अमानत अन्तर्राष्ट्रिय विमानस्थलमा पुर्याएर विमानको आपतकालीन अवतरण गराएका थिए ।
त्यसपछि सबै यात्रुलाई सकुशलतापूर्वक बाहिर निकालिएको थियो । सुरक्षाकर्मीले तत्काल विमान नियन्त्रणमा लिएपछिविमानभित्रै रहेका अपहरणकारीलाई आत्मसमर्पण गर्न भनिएकोमा नमानेपछि उनलाई गोली प्रहार गरिएको थियो ।
उक्त २५ वर्षीय बंगलादेशी युवकले किन विमान अपहरणको प्रयास गरे भन्ने चाहिँ स्पष्ट भएको छैन ।
