काठमाडौं । स्वदेशी उत्पादनलाई प्रवर्द्धन गर्ने भन्दै सरकारले २ सयभन्दा बढी आयातित वस्तुमा भन्सार वृद्धि गरेको छ ।
सरकारले बजेटसँगै ल्याएको आर्थिक विधेयकमा आयातित वस्तुहरुमा भन्सार महसुल वृद्धि गरिएको उल्लेख छ । विधेयक अनुसार कुखुराको मासु, खानेपानी, जुत्ता–चप्पल, बिस्कुट–पाउरोटी, जुस, मरिच, चिया–कफी, आइसक्रिम, रक्सी, डब्बल–क्याप पिकअप लगायतका वस्तुमा भन्सार महसुल ५ देखि ४५ प्रतिशतसम्म वृद्धि गरिएको छ ।
त्यस्तै, इनर्जी ड्रिङ्कसमा भन्सार ४५ प्रतिशतले बढाएर ७५ प्रतिशत र जुत्ता चप्पलमा २० प्रतिशतले बढाएर ४० प्रतिशत पु¥याइएको छ । चिनी उद्योग तथा उखु किसानलाई संरक्षण गर्न भन्दै सरकारले चिनीमा १० प्रतिशत भन्सार बढाएको छ । बदाम, काजु, पेस्ता लगायका वस्तुमा पनि भन्सार १० प्रतिशत भन्सार वृद्धि गरिएको छ । त्यस्तै जुसमा ३०, कफी–चियमा १०, दूध पाउडरमा १० प्रतिशतले भन्सार वृद्धि गरिएको छ । खेलौनाहरुमा भने पाँच प्रतिशले मात्र भन्सार वृद्धि गरिएको छ ।
नेपालमा नै उत्पादन हुने खालको वस्तुमा भन्सार वृद्धि गरिँदा स्वादेशी उत्पादनले बजार पाउने र स्वादेशी उत्पादनलाई विदेशी उत्पादनसँग प्रतिस्प्रर्धा गर्न समेत सहज हुने अर्थमन्त्री युवारज खतिवडाको भनाइ छ । यसले देशको व्यापार घाटालाई घटाउँदै कूल ग्रार्हस्थ उत्पादनमा सहयोग पुर्याउने उद्योगी/व्यवसायीहरुको भनाइँ रहदै आएको छ ।
आयतलाई निरुत्साहित गर्दै सरकारले दूध, माछा–मासु तथा अण्डामा मुलुकलाई आत्मनिर्भर बनाउने योजना बजेटमार्फत अंगालेको छ ।
